MALO O SAMOA
SAUNOAGA O LE TALA FAATATAU O LE TUPE
2006/2007
SUSUGA NIKO LEE HANG
MINISITA O TUPE
30 Me 2006
SAUNOAGA OLE TALA FAATATAU AUTU O LE TUPE 2006/2007
Lau Afioga I le Fofoga Fetalai,
E tusa ai ma le Tulafono Tumau 124, oute fiafia tele e fai ai au ma sui o le Malo, ou te tuuina atu se otootoga o faamatalaga o le Tala Faatatau Autu o le Tupe mo le tausaga 2006/2007 I luma o le laulauafono a le Palemene.
I. FAAVAE O LE TALA O LE TUPE
Lau Afioga I le Fofoga o le Fono, ma Sui Mamalu o le Palemene,
O le Tala Faatatau muamua lenei a le Malo mo lenei paea’iga faale-palemene. O lona uiga, e matua taua tele mo le faataotoina o faiga faavae tau tupe mo le faatinoina o fuafuaga a le Malo mo leisi lima tausaga. Ona o lea mafuaaga, sa faapea ona mataituina ai le aafiaga o ni tulaga ogaoga ua tulai mai I le faagasologa o le tuputupua’e o le tamaoaiga I le fausiaina o lenei Tala o le Tupe mo le 2006/2007, e pei o nei:
1. Le tulai mai o ni aafiaga masani i le tau o le soifuaga e mafua mai ona o le faatupulaia pea o le tamaoaiga mo se taimi umi. I le lima tausaga ua tuanai, sa mafai ona ausia e Samoa se siitaga malosi I lona tamaoaiga, e tusa lea ma le 4.0 pasene I le piriota 2000 – 2005;
2. Le sosoo ai ma le fa’amalosia o faiga faavae o tupe lautele, faatasi ai ma le pa’ū o fefaatauaiga, aemaise ai le siitaga maoae, ma lē faatusatusaina, i le tau o le suauu;
3. Le faaitiitiga o le faatupulaia o le tamaoaiga o le a tulai mai I le vaitaimi o I luma, ona o se faa-fetaiaiga masani, pea a tulai mai ni fesiitaiga ma ni tulaga lē-paleni I totonu o le tamaoaiga e pei ona sa ou taua I luga. E iai le manatu, o le a faamausalī le tamaoaiga I le 2006 ma le 2007, ma e fuafuaina e I le va ole 3-4 pasene le faatupulaia o le tamaoaiga I ia tausaga.
E ao ona ou faapea atu, o se vaega tele ua mafua ai le saosaoa o le faatupulaia o le tamaoaiga na saofagā iai le Malo mai ana faiga faavae tau tupe I tausaga na sei mavae atu nei, e auala lea i vaega tupe tetele sa tuuina atu mo le toe faatulagaina ole tatou kamupani vaalele, ole fausiaina o fale ma malae taaalo mo taaloga o le Pasefika I Saute I le 2007, le fausiaina o le ofisa tutotonu o le Faletupe o Atinae ma le fausiaina o le Univesite ma le Aoga mo Matata Eseese, atoa ai ma isi galuega tau atinae tetele.
I le faagasolo ai o le faaitiitia o le faatupulaia o le tamaoaiga, o le a faapea ona iai se aafiaga i tulaga tau tupe a le Malo. Peitai ane, o loo mausalī le faamoemoe o le Malo o le a faaauau pea lona faatautaia o faiga faavae lelei, mo le saogalemu o le tamaoaiga atoa ai ma lona faatupulaia I tausaga o I luma. E manatu le Malo, o ana faiga faavae tau tupe ua faataatia mo le tausaga faale-tupe 2006/2007, o le a fesoasoani tele lea ina ia lē maualalo tele le pa’ū o le faatupulaia o le tamaoaiga. O se tulaga taua tele lea mo se atunuu tau atia’e laitiiti e iai Samoa, ona o le tele o ni tugā e ono aafia ai si o tatou atunuu. O le mafuaaga ogaoga foi lea e ao ai ona tatou mataituina ma nofo sauni ia mafai ona fetuunai le tatou tali atu I fesuaiga o maketi I le lalolagi, aemaise manaoga o le lautele I totonu o le atunuu I se faiga e laugatasia ai faamanuiaga e maua e tagata uma, ae le o se toaitiiti.
Lau Afioga I le Fofoga Fetalai,
O lenei Tala Faatatau o Tupe mo le 2006/2007, o se Tala o le Tupe, e paleni. O loo fausia lenei Tala o le Tupe I ni faiga faavae tau tupe maumaututu sa faapea ona faatinoina e le Malo I tausaga ua mavae; I le tali atu I se faaitiitiga o le faatupulaia o le tamaoaiga e tulai mai, o loo faapea ona tuuitiitia mai, le faalauteleina o faiga faavae tau tupe a le Malo I le na o le faatupeina o atinae o galuega tetele, e pei o manaoga mo Taaloga o le Pasefika I Saute, le fale o le Faletupe o Atinae ma isi galuega tau atinae tetele I femalagaiga e lagolagoina ai le tatou tali-malo I taaloga o le Pasefika I Saute, ma galuega ua maea ona faatulagaina mo le tausaga fou. I le ma leisi tulaga pito I taua, o lenei Tala o le Tupe o loo tuuina atu ai ni isi fetuunaiga I lafoga ma tiute ina ia ausia ai ni taunuuga pito I lelei I tupe maua mai lafoga, ma faapea ona faasaolotoina ai atili tulaga o loo iai nei mo fefaatauaiga. O nei fuafuaga o le a ou tautala iai I se taimi o I luma.
II. FAAMATALAGA O LE TAMAOAIGA I LE 2005
A tatou vaavaai la i le tatou itulagi, sa faaitiitia le siitaga o le tamaoaiga o atunuu Pasefika mai le 3.1% sa siitia ai i le 2004 i le na o le 2.7% i le 2005. O Niu Sila sa faatupulaia i le na o le 2.2% i le 2005, ae 3.5% na siitia ai le tamaoaiga o Ausetalia faatusatusa i le 2004. O isi atunuu o le lalolagi sa faamauina se faaitiitiga o le faatupulaia o a latou tamaoaiga i le 2005 faatusatusa i le 2004. O se faataitaiga, o atunuu o le atu Europa sa maualalo le latou siitaga i le 2005 e 1.4% pe a faatusatusa i le 1.7% na faatupulaia ai i le 2004. O Amerika na faaitiitia le siitaga o lona tamaoaiga mai le 4.4% i le 2004 i le 3.6% i le 2005 ao Iapani na maitauina le faaitiitia mai le 2.7% i le 2004 i le 1.3% i le 2005. A faatusatusa la i nei atunuu le faatupulaia o le tatou tamaoaiga i le 2005 ma le 2004, o se tulaga maoae ua mafai ona ausia e Samoa.
O le faatupulaia o le aotelega o le tamaoaiga o le lalolagi I le 2005 sa saofagä malosi iai le maoae o le faatupulaia o le tamaoaiga o le Malo o Saina I le 9.9% mai ana oloa fausiaina ma faatauina atu I fafo. O le faaaogaina foi o le suauu e Saina, sa malosi ma televave le agai I luga mai le 3% ile 2001 I le sili atu ma le 14% I le tausaga, I le tolu tausaga na mavae atu nei. O lea siitaga maualuga I le faaaogaina o le suauu faatasi ai ma le faatupulaia o le moomia o le suauu e isi atunuu tetele na tuleia malosi ai I luga le tau o le suauu I le lalolagi.
O le fua faatatau o le soifuaga ua tusa nei ma le 1.8% ia Tesema 2005 mai le 16.3% i le faaiuga o Tesema 2004. O le tele o le pau o le tau o le soifuaga sa unaia malosi e le pa’ū maualalo o tau o mea taumafa i le lotoifale ina ua toe tele fua o faaeleeleaga sa faatau atu i le maketi i Fugalei talu mai le aafiaga i le Afa o Heta i le 2004. E 15% sa faatupulaia ai tupe lautele ile 2005 ma sa unaia malosi lea siitaga e faaunega tupe I le lotoifale, aemaise i le vaega tumaoti. O le siitaga maoae I oloa faatauina mai fafo ma se pa’ū I oloa e faatau atu I fafo, faatasi ai ma le televave o le siitaga o le faaaogaina o tupe faavae mo atinae tetele na fai ma mafuaaga o le maoae o le pa’ū I le paleni o tupe totogi I le 2005. E oo mai la ia Tesema 2005 ua pa’ū tupe faaagaga mo fefaatauaiga I le gafatia ai nao le 5.1 masina o oloa faatauina mai fafo mai le 5.6 masina sa iai I le masina o Tesema 2004.
I le faagasologa o le 2005, na faamauina le taofiofi o le tau e fesuiai ai le Talā Samoa I isi ana paaga tau fefaatauaiga. Sa faamauina se pa’ū laiititi I le tau e fesuiai ai le Tala Samoa I le tupe Amerika ae siitia I tupe a isi uma atunuu.
E $5.97 miliona Tala na siitia teisi ai le aofai o le aitalafu a le atunuu ile $461.6 miliona Tala, I le faaiuga o Tesema 2005 mai le faaiuga o le 2004. O le aofaiga o aitalafu a le Malo I atunuu I fafo, o se tulaga o lo’o gafatia pea e Samoa talu ai ona o nei aitalafu uma e laititi ma maualalo le tului o loo nonoina mai ai. I le taimi nei, o tupe faaalu mo le toe totogiina o nei aitalafu e tusa lea ma le 1.6% o tupe maua mai lafoga, poo le 1.8% o le aofai o tupe maua mai fefaatauaiga pe a faaliliuina I le faatulagaga o fuainumera faamauina (GFS).
Ua tuuina atu faatasi lenei tala o le tupe ma le Faamatalaga o le Tamaoaiga mo le 2005. Ma oute fautuaina malosi sui mamalu uma o le maota, ina ia silasila i le Faamatalaga o le Tamaoaiga o loo faapipii atu, aua o loo auiliili ai vaega eseese o le tamaoaiga, faatasi ai ma se vaaiga taulai mo le lumanai, ina ia saga faamalieina atili ai taiala o faamatalaga manino ma auiliili a lo tatou Malo.
III. VAAIGA TAULAI MO LE 2006/2007 MA LE LUMANAI
Ua maitauina le ono faaitiitia o le faatupulaia o le tamaoaiga i le maea ai o se siitaga maualuga sa ausia I le lima tausaga ua tuanai, lea sa ausia ai le 5.1% le siitaga o le GDP ile 2005, poo se fua faale-tausaga e 4% I le piriota 2000 – 2005. O le fua faatatau o le a iai le tamaoaiga, o loo fuaina e le I luga ifo o le 3-4% I le 2006 ma le 2007. O lea tuuitiitiga ua atagia ai le aafiaga ona o le faamalosia o faiga tau tupe, faatasi ai ma fetuunaiga masani I le maea ai o se taimi umi e maualuga ai le tamaoaiga. O le a ogatasi foi lea fua faatatau ma se fua faatatau o le faatupulaia o le tamaoaiga o le lalolagi I le 3.6% ile 2006 ma le 3.4% I le 2007.
Ua faamoemoe o le a toe siitia gaoioiga o le tamaoaiga e amata mai le tau faaiuga o le 2007. Ua fuafuaina e oo atu I lea taimi ua faaititia le avega I luga o tupe faaalu I le maea ai o Taaloga o le Pasifika I Saute ma le fale ole Faletupe o Atinae o Samoa ma amata maua ni faamanuiaga mai taaloga. O faasiliga sa faatupulaia ma taofiofia ai le alualu I luma o tupe faavae mo atinae tetele o le a fesoasoani lea I le unaia o le fatupulaia o le tamaoaiga.
O le malosi o le faatupulaia o le tamaoaiga I le lima tausaga ua tuanai sa tele ina unaia e atinae tetele a le Malo. I le faagasologa o tausaga, o le faatupulaia o ia atinae tetele sa amata aafia ai le paleni o tupe totogi faatasi ai ma le tulaga o tupe moomia pea e le Malo mai faletupe I totonu o le atunuu. Ona o lea tulaga, ua alagatatau ai ona tatou tau taofiofi, ma le agaga ina ia aua nei aafia le tulaga mausali o le tamaoaiga ua tatou ausia. E manaomia la ina ia paleni faiga faavae tau tupe a le Malo ma faiga faavae tau tupe lautele, ina ia faaititia ai ni tugā e ono tulai mai I le televave o le faatupulaia o le tamaoaiga.
E tusa ai ma le naunautaiga ina ia tumau le mausali o le tamaoaiga, ua tuuina atu e le Malo se Tala o le Tupe mo le 2006/2007, e paleni. O le a faapea ona toe faamalosia ai le tulaga tau tupe a le Malo ma faletupe I totonu o le atunuu, faatasi ai ma le toe faamalosia o tupe avanoa mo galuega, I totonu o faletupe, ma faapea ona avanoa ai vaega tupe mo nonoga tupe a le vaega tumaoti. Talu ai ona o le maoae o manaoga mo tupe faavae faafaigaluega mo Taaloga o le Pasefika I Saute, ma le Faletupe o Atinae atoa ai ma isi atinae faamuamua a le Malo e pei o atinae o aoaoga ma le soifua maloloina, I le ma le naunautaiga ina ia paleni le tala o le tupe, ua fuafuaina ai ni faiga fou mo tupe maua, o le a ou tautala iai mulimuli ane. O nei faiga fou tau tupe maua, o le a mafai ona ausia ai le faatinoga o a tatou galuega seia aulia le faaiuga o le 10 tausaga o faagasolo nei.
E iai lo’u talitonuga o loo malosi le tatou tamaoaiga e tali atu ai I nei suiga ma faiga faavae fou, ma oute talitonu foi o le a le umi se taimi e fetuunai ai se pa’ū o manaoga o tagata lautele e tulai mai. I leisi itu, o le a faapea ona toe faamausali ai le tulaga tau tupe a le Malo. O le a fesoasoani foi Taaloga o le Pasefika I Saute, faatasi ai ma gaoioiga I le vaega o atinae tetele e lagolagoina ai taaloga, I se fetuunaiga e tulai mai ona o nei faiga faavae fou.
I le aotelega o fefaatauaiga I fafo, o le a ono aafia le paleni o tupe totogi ona o le faatupulaia o le pa’ū I fefaatauaiga. Ae o lenei tulaga, o le a mafai ona foia teisi e se siitaga o tupe faamomoli mai fafo ma tupe maua mai tagata tafafao maimoa mai. Ua fuafuaina foi o le a tausisia le aofaiga o tupe faaagaga mo fefaatauaiga I luga ifo o le tapulaa maulalo e 4 masina o oloa e faatauina mai I fafo. Ona o le tulaga e faamalosia ai faiga faavae tau tupe lautele, o le a faapea ona tulai mai ai se faaititiga o manaoga mo nonoga tupe I totonu o le atunuu faatasi ai ma le faaititia o le faataamiloga o tupe lautele. E sili atu ma le 5% se fua faatatau o le siitaga o le tau o le soifuaga o le a iai I le faaiuga o le 2006. O le siitia pea o le tau o le suauu, faatasi ai ma se aafiaga o faiga faavae fou o le ou tautala iai mulimuli, o mea ia o le a iai se saofaga I le faatupulaia o le tau o le soifuaga. E iai le manatu o le a tumau pea le tulaga siitia o le faaaogaina o le suauu e le lalolagi nai lo le suauu e maua, ma mafua ai ona faaauau le siitia pea o lona tau, ma ono tulai mai ai ni aafiaga tugā I le mausali o tau o oloa.
IV. TAIALA O LE TALA O LE TUPE
Lau Afioga I le Fofoga Fetalai ma Sui Mamalu o le Palemene,
E pei ona ou taua I se taimi ua fano, o lenei Tala o le Tupe mo le 2006/2007 sa fausiaina ma le sini autu ia aua nei iai, pe tuuitiitia foi, se sao o faiga faavae tau tupe a le Malo i ni aafiaga poo ni to’atugā e tulai mai I le tamaoaiga e ono aafia ai le mausalī o le aotelega o le tamaoaiga. O le mafuaaga tonu lea ua avea ai ma taiala le ausia o se paleni i le taunuuga o lenei Tala o le Tupe. O le sini autu o lea faamoemoe o le faamalosia lea o le faatumauina o le mausalī o le aotelega o le tamaoaiga ae ia faaavanoa pea puna’oa talafeagai mo le atinaeina o le vaega tumaoti. O se taunuuga fuafuaina mo le aotelega o tupe pa’ū ia le sili ae I le 3% o le tamaoaiga e gafatia lea mo le faatupeina o ni atinae taua, I le maea ai ona iloiloina lelei.
V. OTOOTOGA O LE TALA FAATATAU O LE TUPE
Lau Afioga i le Fofoga Fetalai,
O le otootoga lenei o le Tala Faatatau o le Tupe 2006/2007.
|
|
|
|
|
Tupe Maua |
|
$506,818,499 |
|
Tupe Maua Masani |
408,343,906 |
|
|
Tupe Faameaalofa mai Fafo |
98,474,593 |
|
|
|
|
|
|
Tupe Faaalu |
|
$539,725,676 |
|
Tupe Faaalu Faaletulafono |
43,675,090 |
|
|
Tupe Faaalu I Poloklame |
360,711,517 |
|
|
Tupe Faaalu I Atinae Tetele |
131,731,954 |
|
|
Tupe Faaalu le Fuafuaina |
3,607,115 |
|
|
|
|
|
|
Aotelega o Tupe Pa’ū |
|
$ 32,907,177 |
|
|
|
|
|
Faatupe mai: |
|
|
|
Nonoga Tupe mai Fafo |
33,257,361 |
|
|
|
|
|
|
Tupe Faasili |
|
$ 350,184 |
|
|
|
|
|
|
|
|
Ua faaalia manino I le aotelega o le Tala o le Tupe 2006/07 o le a iai se aotelega o tupe pa’ū e $32.91 miliona Tala o le a faatupeina mai nonoga tupe mai fafo e $33.26 miliona Tala. O le faaliliuina o le Tala o le Tupe I le faatulagaga o fuainumera faamauina (GFS), ua faamauina ai e 1.4% o le tamaoaiga se faasiliga o tupe faaalu I lona aotelega. O lea tupe pa’ū o loo maulalo mai le matati’a e 3% o le tamaoaiga e taofifia ai, ma o se taunuuga lea e mafai ona tauaveina e le tamaoaiga aemaise ona o se vaega tele o le Tala o le Tupe o loo faataotoina mo le faatupeina o atinae tetele faapitoa.
VI. FUAFUAGA MO TUPE MAUA
Lau Afioga I le Fofoga Fetalai ma Sui Mamalu o le Palemene,
O le a ou liliu atu loa ile vaega o tupe maua o le Tala o le Tupe. O le a iai ni suiga e faalautele ai tupe maua e aofia ai le faaitiitia o nisi o lafoga atoa ai ma le siitia o isi. O nei suiga, o se polokalame faaauau a le Malo, na amata mai I le 1987, lea sa faatino ai le lafoga VAGST, ma faaauau ona fetuunai e oo mai I le asō.
O fetuunaiga sa faatinoina I le sefulu tausaga ua tuanai, na aofia ai ni faaitiitiga tetele I luga o oloa e auina mai fafo – o tiute pito I maualuga I le va o le 60% ile 100% sa faaititia I le 20%. O tiute sa tai 35% ma luga ifo sa faagasolo ona tuuina mai I lalo seia ausia le 8%, 5% ma le 0% o loo iai nei. O nisi o nei oloa ua leai se tiute e totogiina e aofia ai meaai taumafa e pei o le araisa, falaoa mata, suka, aano o moa, ia ae faapea foi fualaau, vailaau ma oloa tau falemai (medical supplies). I lafoga I luga o totogi o tagata taitoatasi, na amata siitia ai le tapulaa o le totogi e leai se lafoga mai le $6,000 I le $10,000, ma faasolo atu ai fesuiaga o isi tapulaa maualuluga. O le tapulaa pito I maualuga mo lafoga a tagata taitoatasi ma kamupani sa faapea ona faaitiitia mai le 35% I le 29% i le tausaga 2000. Na faapea foi ona faale-aogaina lafoga excise I luga o le tele o oloa sei vagana ai taavale e I luga atu o le 2000cc le malosi o le afi; sikaleti; ava malosi; vaiinu suamalie; ma le suau’u.
O se faaiuga lata mai nei a le Komiti a Malo Aufaatasi mo Faiga Faavae Tau Atinae (CDP) ina ia se’e ese Samoa mai lona tulaga o se atunuu e ititti lona tamaoaiga (LDC) I le tausaga 2010, o le a tulai mai ai ni tulaga ogaoga I le lumanai I le tau o nonoga tupe, aemaise ai le totogiina o a tatou aitalafu. O lenei faaiuga a le CDP, sa faavaeina I luga o se latou suesuega e faapea o loo tumau ona ausia pea e Samoa le lelei o lona tamaoaiga, aemaise ai le maualuga o le tulaga ua maoae ai le faasiliga o le tulaga o le atinae o le tatou tamaoaiga ma le aafiaga ole tamaoaiga lautele, mai faailoilo faavae a le CDP mo atunuu e laititi le tamaoaiga.
O le a faapea foi ona tele se aafiaga o se ala-oa ititi o loo tatou faalagolago iai, pe afai tatou te ausia manaoga uma e lagolagoina le faalauteleina o fefaatauaiga I lalo o feagaiga ua tatou sainia pe a tatou ofi atu I le WTO, ma feagaiga faaitulagi o le PICTA (Pacific Island Countries’ Trade Agreement) ma le PACER (Pacific Agreement on Closer Economic Relations); o ia feagaiga faaitulagi o loo puipuia ai fesootaiga tau fefaatauaiga I le va o atunuu o le Pasefika ma Niu Sila ma Ausetalia. Faaopoopo iai I nei vaega ia le feagaiga faa-paaga I tulaga tau tamaoaiga (EPAs) ile va ole Iuni a Europa ma atunuu ole Pasifika ua avea ma sui ole vaega ole ACP.
Lau Afioga I le Fofoga Fetalai ma Sui Mamalu o le Palemene,
O se otootoga lena o nisi o fesuiaga tetele tau tupe maua ua faatinoina e oo mai I le asō, atoa ai ma tulaga ogaoga ua tulai mai I lenei vaitau, e tele se aafiaga o le faavae tau tupe maua ole a o’o iai. Ole mea lea, o suiga o lafoga ma tiute ua fuafuaina o loo taulai uma ina ia ausia sini autu nei a le Malo:
i. Ia faaauau le faatinoga o fesuiaiga talafeagai, ina ia soloia uma ai faasolosolo tiute ma nisi lafoga talafeagai, ina ia o gatasi ma le tulaga o fefaatauaiga faava-o-malo ua tulai mai i le lalolagi, atoa ai ma le avea o le VAGST ma tupe maua autu a le Malo faatasi ai ma isi lafoga ma tupe totogi;
ii. Ia siitia le faaopoopoga o tupe maua a le Malo e faatupe ai atinae mo le manuia lautele o tagata uma;
iii. Ia faatupe atinae faamuamua e pei o itu tau aoaoga, soifua maloloina, vaega o faatoaga ma atinae tetele; ma
iv. Ia amatalia fuafuaga e lagolagoina ai le se’e ese mai o Samoa mai le Vaega o Atunuu e Laitiiti Le Tamaoaiga.
Lau Afioga I le Fofoga Fetalai,
E talitonu le Malo, o le atinaeina o ona tagata o le sini lea o faamoemoe mo le atinae o Samoa I le lumanai. O le aoaoina ma le soifua maloloina o ona tagata, o ni sao autu ia I le faamausaliina o le tamaoaiga. Peitai ane, o loo faatupulaia pea le maualuga o le siitia o vaega tupe moomia mo le faatinoina o ia auaunaga. Ua maoae le faatupulaia o vaega tupe manaomia mo le soifua maloloina. Ona o lea tulaga, ua amata iloiloina ai e le Malo tupe faaalu uma mo auaunaga tau soifua maloloina aemaise le auina atu o gasegase mo togafitiga I fafo, ina ia faia ni fuafuaga e saofagā ai le mamalu o le atunuu I tupe faaalu ona o le saosaoa o lona alualu I luga. O loo faapea foi ona maualuga le vave faatupulaia o vaega tupe moomia mo aoaoga, ma atinae tetele e lagolagoina ai manaoga faa-onaponei o tagata lautele, ma ua televave atu lea nai lo le faatupulaia o tupe maua a le Malo. O lona uiga, e le mafai ona tatou faamalieina uma manaoga o le atunuu mo auaunaga lautele ma atinae tetele e aunoa ma se aafiaga I le tulaga saogalemu o le tulaga tau tupe a le Malo. E le mafai foi ona tatou faaauau ona faaopopoina pea tupe pa’ū I Tala o le Tupe ma faaauau ona fai ni nonoga tupe, e aunoa ma se aafiaga o ni tatou nonogatupe i le lumanai, poo se aafiaga foi I le tau o le tatou tupe, ma e ono faaleaogaina ai le tulaga siitia o loo tatou iai nei.
E taua ona ou faamanino muamua nei vaega uma ae lei o’u faailoaina atu suiga fou nei I luga o tupe maua:
1. Suiga o le VAGST
O le a siitia le VAGST I le na’o le 2.5% mai le 12.5% o loo iai nei ile 15.0% e amata mai I le aso 1 Oketopa 2006. Ua filifilia lea aso ina ia mafai ai ona faatinoina fesuiaiga a pisinisi ma Matagaluega a le Malo. E lei faigofie le faia o lenei faaiuga e le Malo, ae sa silasila le Malo I le tau faapaleniina o manaoga I le Malo mo galuega ma atinae tetele, le tumau pea o le tulaga saogalemu tau tupe a le Malo, ae tainane se manaoga ina ia faaauau le fesuiaiga o a tatou lafoga. O le a fesoasoani se faaitiitiga o lafoga a tagata taitoatasi, o le a ou faamanino atu mulimuli, I se aafiaga o le siitaga o le VAGST. E ao foi ona ou faaali atu aafiaga o lenei siitaga I le mamalu lautele o le atunuu; oute fia faailoa atu e le aafia le tele o oloa ma auaunaga I le lafoga o le VAGST. O ia oloa ma auaunaga e aofia ai le eletise, vai, pasese o pasi ma taavale laiti, se vaega o pili tau soifua maloloina ma aoaoga, ma le tele o isi oloa e pei o i’a, fualaau aina ma fualaau mata.
O nisi o fuafuaga, e aofia ai le tuuina I luga o le tapulaa o faatauga a kamupani laiti e manaomia ai le resitalaina mo le totogiina o le VAGST mai le $52,000 o loo iai nei I le $78,000 I le tausaga. O lona uiga e 100 ma ona tupu kamupani laiti o loo resitalaina nei mo le VAGST o le a le manaomia le toe resitalaina – o le a faaitiitia ai foi ma tupe faaalu I ia kamupani mo le tausisia o ia tulaga, faatasi ai ma le faasaoina ai o le taimi ma tupe faaalu a le Matagaluega o Tupe Maua e vaavaaia ai ia pisinisi laiti, ae tagai I kamupani e tatau ona totogiina ia le VAGST.
O se faaopoopoga o tupe maua a le Malo mai suiga o le VAGST e tusa lea ma le $14.75miliona Tala i le 2006/07.
2. Tuuitiitia o Lafoga o Totogi ma Lafoga a Kamupani
Ua fuafuaina e le Malo se faamama avega ile siitaga o le VAGST I le faaititia lea o lafoga I totogi ma lafoga a kamupani. Mo tagata taitoatasi, o le a siitia le tapulaa mo totogi e agavaa I le leai o se lafoga e totogiina mai le $10,000 ile $12,000, peitai, o le a le suia tapulaa o isi vaega uma. O lona uiga, o le tagata faigaluega e oo atu I le $460 lona totogi I le lua vaiaso, o le a leai se lafoga e totogiina. O le a faapea foi ona faaititia mai le 29% I le 27% le lafoga mo le tapulaa pito I maualuga I totogi o tagata taitoatasi, ma lafoga o kamupani. Mo le silafia e Lau Afioga ma le mamalu o le Palemene, o le taimi mulimuli sa fetuunai ai tapulaa mo totogi o tagata taitoatasi o le 1999, ae o le tapulaa mo kamupani sa gata mai se fetuunaiga I le tausaga 2000.
O nei suiga o le a amatalia I le aso 1 Ianuari 2007, ma o le tau fuafuaina o tupe o le a lē maua e le Malo e tusa lea ma le $1.85 miliona Tala i le tausaga 2006/2007.
3. Lafoga Excise I Luga o Vaiinu Suamalie, Ava Malosi, ma Sikaleti
O lafoga excise I totonu o Samoa e tele ina tā-mauina, o lona uiga e tatau ona fesiitai faavaitaimi ina ia o gatasi ma le tau ole soifuaga. Na pau mai le suiga o lafoga excise, I le tausaga 2002. O loo faapea foi ona naunau le Malo ia faaleleia le soifua lautele o ona tagata, ma e fesoasoani I le ausia o nei taunuuga le faaopopo o lafoga I luga o nei oloa.
O le a faapea ona siitia ai le excise o vaiinu suamalie ma ava malosi I le 10% e amata faamamalu I le aso 1 Iulai 2006. O le a faapea foi ona siitia le excise o vaiinu suamalie mai le 33 sene I le lita, I le 36.3 sene ile lita, ae o le a siitia le excise I luga o le ava malosi mai le $33 I le $36.30 I le lita o le ava malosi. O se faataitaiga, o le a siitia ile 17sene le tau o le fagu-pia lapo’a 750ml, ma siitia ile 33 sene le fagu uaina pa’epa’e.
O le a siitia foi le lafoga o sikaleti. O le excise mo sikaleti ta’ai o le a faamamaluina amata mai I le aso 1 Iulai 2006 se siitaga mai le $127.36 I le kilo-kalama, I le $185 ile kilo-kalama. O le lafoga excise o pepa sikaleti o le a siitia mai le $149.18 ile 1,000 sikaleti, I le $175 ile 1,000 sikaleti, ma e amata faamamalu I le aso 1 Fepuari 2007.
Ou te fia faailoa atu foi e ui ina e tatau foi ona fetuunai le lafoga excise o le suau’u, ae talu ai ona o le maoa’e tele o le siitia o le tau o le suauu ile lalolagi, ua manatu ai le Malo o le a le faatinoina lea tulaga I le nei taimi.
O tupe maua faaopoopo o le a maua mai I lafoga o excise ua ou faailoaina atu, e tusa lea ma le $4.7m Tala ile tausaga 2006/07.
4. Tupe Totogi Mo le Faatinoina o Galuega e le Matagaluega o Tupe Maua
O le a siitia le tupe totogi mo le tuai ona faaooina pepa o lafoga o totogi, mai le $10 ile $100 mo tagata taitoatasi, ma le $25 ile $300 mo kamupani. O nei tupe totogi, e lei suia lava talu mai le tausaga 1974 na faavae ai. O le sini autu o nei siitaga, o le taumafai lea ina ia siitia le usitaia o le tulafono o lafoga o tupe maua, ae le o le aoina mai o ni vaega tupe faaopoopo.
O le a faapea foi ona siitia le tupe totogi mo le faagaoioina o pepa o tiute poo customs entries mai le $10 ile $20. O le tupe totogi o loo iai ile taimi nei na faavaeina ile tausaga 1999.
O nei suiga I tupe totogi o le a faamamaluina ile maea ai ona tapenaina vave teuteuga I Tulafono Faatonutonu a le Matagaluega o Tupe Maua. O vaega tupe faaopopo e fuafua e maua mai ai e tusa lea ma le $700,000 I le tausaga 2006/2007.
VII. TUPE FAAALU MO GALUEGA MA ATINAE FAAMUAMUA
Lau Afioga I le Fofoga Fetalai ma Sui Mamalu o le Palemene,
Ou te fia tuuina atu se otootoga o galuega, ua ave iai le faamuamua a le Malo mo le tausaga faale-tupe 2006-2007.
O le aofaiga o tupe faaalu a le Malo ua fuafuaina e $539.7 miliona Tala poo se siitaga lea e 16% mai le tala faatatau o le tupe I le tausaga faaletupe 2005/2006. O lea siitaga I le aotelega o tupe faaalu o loo atagia ai le faaauauina o le faamaeaina o tapenaga mo Taaloga o le Pasefika I le 2007, faatasi ai ma le faatinoina o atinae o loo ave iai le faamuamua i le Vaaiga Taulai mo le Atinae o Samoa 2005-2007. O loo faapea foi ona faaavanoaina se vaega tupe i lenei Tala o le Tupe e faaauau ai le siitaga o totogi o le aufaigaluega a le Malo, lea e faamae’aina i le siitaga mulimuli I le tausaga faale-tupe 2007/2008, e pei ona faaalia i le tausaga na sei mavae atu nei.
1. Aoaoga
O le vaega o Aoaoga o lo’o tumau pea ona ave I ai le faamuamua a le Malo aemaise I le atiinaeina o aoga I nuu tua ina ia laugatasia avanoa tau aoaoga mo alo ma fanau I totonu o le atunuu.
(i) I lea itu, ua toe tuuina atu le $2.5 miliona Tala mo le faatauina o meaaoga saunia mo aoga a nuu ma alalafaga I tua. Ua faapea foi ona faaagaga le $0.08 miliona Tala mo faasalalauga tau aoaoga ina ia laugatasia ai le iloa e alo ma fanau I nuu tua ma le tala-fatai o Apia o mataupu aoaoina. O lo’o tuliloaina pea e le Malo le faaaogaina o fesootaiga faa-tekonolosi mo aoaoga lea o lo’o fesoasoani malosi mai ai a tatou paaga mai fafo.
(ii) E iai le faamoemoe o le amatalia o le vaega lua o le poloketi mo le Atinaeina o le Vaega o Aoaoga lea o loo faatupeina e le Malo o Ausetalia, Niu Sila ma le Faletupe o Atinae o Asia ma le tatou Malo, o le a fesoasoani tele lea i le foia o faafitauli e pei o le aoaoina o faiaoga, faleleia atili o mataupu aoaoina ma le fausiaina o faleaoga I le vaega o Aoga Maualuluga ma Kolisi e pei ona faia mo aoga maualalalo.
(iii) Ina ia unaia pea le aoaoina o alo ma fanau, e $5.2 miliona Tala ua faaagaga mo avanoa sikolasipi i Iunivesite I fafo ma le $0.85 miliona Tala mo avanoa sikolasipi I le tatou Iunivesite Aoao a Samoa.
(iv) Ua faaauau foi le fesoasoani tau tupe a le Malo mo aoga tumaoti ma aoga a Ekalesia e pei ona faatatauina ai le $4.0 miliona Tala.
(v) E $0.28 miliona Tala se vaegatupe ua faaagaga mo le faatauina o mea tau aoaoga e manaomia mo le faatinoina o nisi mataupu fou I aoga maualuluga ma Kolisi e aofia ai mataupu o le Agriculture Science, Food ma Textiles, ma le Technology ma Design. Ua tuuina atu le $0.13 miliona Tala mo le faaleleia o fale e nonofo ai faiaoga I le Kolisi I Avele.
(vi) Mo le Iunivesite Aoao o Samoa lea ua tuufaatasia ai ma le Aoga Matata Eseese, ua tuuina atu e le Malo le $7.0 miliona Tala. O loo fesoasoani mai foi le Malo o Iapani I le fausiaina o le Aoga Matata Eseese I se aofaiga e $15.8 miliona Tala.
(vii) Mo le itutino fou o le Pulega o Mea Tau Faailoga, e $1.13miliona Tala ua faatatauina mo le tausaga muamua lenei, e faaopopo I le fesoasoani a le UNDP e $2.38 miliona Tala.
(viii) E fia faatauaina foi le sao o a tatou paaga I le vaega o Aoaoga I le tele o tausaga ua mavae aemaise I le itu o le atinaeina o faleaoga I nuu I tua e pei ona iai le fesoasoani a le Malo o Saina mo le fausiaina o se faleaoga I Aele.
2. Soifua Maloloina
O le tausaga faaletupe lenei o le a faatinoina ai le tuueseeseina o le itutino o le a vaaia le faagaioiga o falemai uma, mai le Matagaluega o le Soifua Maloloina lea sa faaataata atu I le tausaga nei e pei ona tuueseeseina ai tala o le tupe mo vaega nei e lua. O le Matagaluega o le Soifua Maloloina o le a taulai le vaai I faiga faavae ma le mataituina o auaunaga faale Soifua Maloloina i falemai uma aemaise ai le faatinoina o le auaunaga tau le puipuiga o le soifua maloloina lautele. Ua faapea foi ona faatumaotiina le faagaioiga o le Falemai mo le togafitia o gasegase o le fatugao (Samoa Kidney Foundation) ina ia maioio ma manino lelei le faatinoina o nei auaunaga taua tau soifua maloloina. I lenei taimi, oute fia faamauina ma le agaga faafetai fesoasoani a Ekalesia ma isi Faalapotopotoga tumaoti e pei ole Komiti a Tina o le Ekalesia EFKS, le Ekalesia Metotisi, le Ekalesia Assembly of God, le Peace Chapel ma isi I le tatou Kidney Foundation. O nei fesoasoani faatasi ai ma fesoasoani a le Singapore Kidney Foundation ua fesoasoani malosi I le Malo e faavaeina ai lenei auaunaga taua. E faafetaia le agalelei o Ekalesia ma nei Faalapotopotoga uma, ma e maualuga le faamoemoe o le a faapea ona faaauau pea le lagolagosua a Ekalesia, Faalapotopotoga ma kamupani tumaoti ina ia mafai ai ona faatino galuega ma le auaunaga a le tatou Falemai mo Gasegase o le Fatuga’o mo le mamalu o le atunuu.
O vaegatupe nei ua faatatauina mo ia itutino:
Matagaluega o le Soifua Maloloina $ 5.9miliona
Itutino mo Galuega & Auaunaga tau Falemai $38.9miliona
Falemai Faamama Toto $ 2.6miliona
(i) E $0.7 miliona Tala se vaegatupe ua faaagaga mo mea faigaluega a le Itutino mo Galuega & Auaunaga tau Falemai
(ii) E $5.4 miliona Tala ua faatatauina mo le auina atu o gasegase mo togafitiga I atunuu I fafo, ae $0.27 miliona Tala mo le togafitiga o le moe taagulu.
(iii) E $0.10 miliona Tala ua faamoemoe e amatalia ai le galuega o le toe fausiaina o le nofoaga mo tamaitai tausi mai; ma leisi -
(iv) Ina ia unaia pea le soifua maloloina o tatou tagata I nuu ma alalafaga I tua, ua faaagaga ai le $0.03 miliona Tala mo le faatinoina o se polokalame faamalosi tino I nuu I tua. O leisi lea vaega o vaega tetele e lua o le puipuiga ma le togafitiga, e ao ona faatinoina e soo se tagata.
Lau Afioga I le Fofoga Fetalai ma Sui Mamalu o le Maota,
E ia te au le agaga fiafia e faailoa atu ai ua maea nei ona faamaonia konekarate mo le toe faaleleia o falemai faa-itumalo i Lalomanu, Safotu ma Poutasi lea e faatupeina e le Faletupe o le Lalolagi I lalo o le poloketi o le Faaleleia o Falemai ma le Auaunaga tau Soifua Maloloina. O lenei vaega o le atinae e faamoemoe e faamaea ia Tesema 2006 ma ua faatatauina ai le $1.2 miliona Tala ole sao a le Malo I lea atinae taua.
3. Faatoaga
O le sini autu I le 2006/2007 mo lenei vaega ole tamaoaiga, o le faamalosia lea o oloa gaosi tau faatoaga. O le faatauaina o le atinaeina o maketi mo faaeleeleaga o le a fesoasoani lea I le au fai-faatoaga e atinae ai lea vaega o le tamaoaiga. Mo le lagolagoina o lea tulaga, e $12.0 miliona Tala ua faatatauina e le Malo mo le Vaega o Faatoaga, e aofia ai tupe faaalu fuafuaina nei:
(i) E $1.7 miliona ua fuafuaina mo le vaega o Faigafaiva ole Matagaluega e faaauau ai le auaunaga a le Malo aua le saga unaia pea ole tulaga tau faiga faiva I soo se itu uma. E $13.4 miliona Tala ua fesoasoani mai ai le Malo Iapani mole faaleleia o uafu tau faiga-faiva, ofisa ma isi vaega tau faiga-faiva. O loo faaagasolo nei lenei galuega ma ole a fesoasoani tele ile auaunaga ole nei vaega taua.
(ii) Mo le lagolagoina o le puipuia o Samoa mai faamai ma manu ninii e ofi mai I totonu o le atunuu ma ono lamatia ai a tatou faatoaga ma le siosiomaga, ua faatatau ai se vaega tupe e $1.0 miliona Tala i le Tala o le Tupe a le Matagaluega o Faatoaga mo auaunaga mo le puipuiga, ma le faatonutonuina o felauaiga o fua o faatoaga.
(iii) E $1.4miliona Tala o loo faatatauina mo le faalauteleina o auaunaga mo faufautua ma suesuega I atinae tau lafu manu, mo le sini autu ia faaleleia atili atinae tau lafu manu mo le fofoga taumafa o le atunuu faapea ai ma fefaatauaiga. Ua maea nei ona faatuina le fale gaosi meaai mai aano o manu fasi mo aoaoga, ma suesuega a le Matagaluega ma o loo faalauiloaina foi le avanoa o lenei aoaoga mo le tatou itulagi. Oute fiafia foi e faailoa atu, o loo tuuina atu I totonu o lenei tala o le tupe le tupe faaalu mulimuli mo le totogina o le aitalafu sa faatauina mai ai manu papalagi mai fafo ile tausaga 2003.
4. Atinae Tetele
O nisi nei o atinae tetele a le Malo o le a faatinoina I le 2006/07 e lagolagosua ai pea I le atinae o le tamaoaiga:
(i) Eletise
O lo’o faatupeina pea e le Tala o le Tupe le tau o galuega a le Faalapotopotoga o le Malosi Tau Eletise mo le manuia o tagata lautele I nuu ma alalafaga I tua (community service obligation) e ala atu i le faamoliina o auala tele. E $10.7 miliona Tala o le a totogina atu e le Malo mo nei galuega ogaoga ae o le a toe tuuina mai e le Faalapotopotoga se vaegatupe tutusa mo le totogina o a latou aitalafu I le Malo.
Ua faapea foi ona tuuina atu e le Malo I le Faalapotopotoga se faamama avega e tusa ma le $2.0 miliona Tala aua le totogiina o le VAGST I luga o le suau’u tiso (diesel) o loo manaomia mo afi moli.
(ii) Suavai
E $2.98 miliona Tala lea o le a tuuina atu I le Faalapotopotoga o le Suavai e fesoasoani I le faatupeina o le latou auaunaga I tagata I nuu ma alalafaga I tua aua le faaooina atu o le suavai mama. Ae $0.88 miliona Tala o le sao lea a le Malo I le poloketi mo le Faaleleia o le Suavai lea o loo faatupeina e le Iuni o Atunuu Europa, e tusa lona tau aofai ma le $60 miliona Tala, ma le $0.52 miliona Tala mo le tatou sao I le poloketi a le Faletupe o Atinae a Asia o le Suavai Lafoa’i lea ua faagasolo ma fuafuaina e maea I le tausaga 2009. O le tau aofai o lenei poloketi e aofia ai tupe faamealofa mo tomai faapitoa ma nonoga-tupe e tusa lea ma le $35 miliona Tala.
(iii) Fesootaiga
O lo’o faapea foi ona faaauau le sao a le Malo e $0.34miliona Tala mo le atinae o le Faaleleia o Fesootaiga lea o loo faatupeina e le Faletupe o le Lalolagi. O nisi o taunuuga o lenei atinae e aofia ai le laisene lona lua mo telefoni feaveai lea ua tatalaina atu I le Digicel Samoa Ltd, o se kamupani soofaatasi a se kamupani mai fafo ma se kamupani Samoa o le CSL Ltd. E iai le talitonuga o le a so’o ia le atunuu atoa I fesootaiga faanei-onapo I le afa mulimuli o le tausaga mai le auaunaga a nei kamupani e tolu. Ua maitauina foi le faatupulaia o fale e faaaogaina ai le fesootaiga faa-tekonolosi (internet cafes) ma fale-telefoni (pay phone centres) aemaise I nuu tua, le faaaogaina o pepa telefoni, telefoni home zone ma le pa’ū faifai pea o le tau o le valaau i nuu mamao.
Ou te fiafia foi e faailoa atu o le a faatuina I le isi lua vaiaso o lumanai le tofiga o se Telecommunications Regulator ma o le a faapea ona se’e ese atu iai matafaioi faatonutonu mai le Matagaluega o Fesootaiga ae taulai le vaai i faiga faavae e aofia ai lea vaega o le tamaoaiga. I lea itu, e $0.92million Talā le vaegatupe ua faatatauina e faavaeina ai lea Ofisa, e nafa tonu ma le mataituina o le auaunaga a kamupani tau tekonolosi, ina ia unaia tulaga mo le latou auaunaga I faiga faatauva. O ia faiga e le gata e siitia ai le tulaga lelei tau fesootaiga ae maise le mafai ona tatou fesootai atu I soo se atunuu ole lalolagi, atoa ai ma le tuuitiitia ole tau o nei fesootaiga pe a solo lelei mea uma.
(iv) Auala Tetele ma Ala Laupapa
E pei ona silafia, sa feagai le atunuu ma ni lologa mai le tele o timuga e le masani ai, i le amataga ole tausaga nei, ma faapea ona aafia ai nisi o auala ma galuega tetele taua a le atunuu. Ona o lea tulaga, e ogaoga lava vaegatupe e loo fuafuaina mo le faaleleia o auala ma ala laupapa ina ia faafaigofie femalagaiaga I totonu o le atunuu. Mo le tausaga faale-tupe o loma nei, o le a agai le atinae o auala I vaega manaomia mo le Taaloga o le Pasefika I Saute 2007 ina ia faa-faigofie femalagaiga i auala I lea vaitaimi. O le a faapea foi ona faaleleia ma nisi o vaega e tatau ona faia ina ia faaitiitia ai le aafiaga o le atunuu mai nisi o tulaga tūga faale-natura e ono tulai mai. Mo le faaleleia faifai pea (routine maintenance) o auala i Upolu ma Savaii ua faaagaga I ai le $6.2 miliona Tala ae $2.4 miliona Tala mo galuega faaleleia masani.
O lo’o faagasolo pea le vaega lua o le polokalame a le Faletupe o le Lalolagi mo le Pulea Lelei o Meatotino ma Atinae Tetele i Samoa; o loo ua tuuina iai le $5.0miliona Tala o le sao o le Malo. Ua fuafuaina foi le toe faia o se nonogatupe faaopopo (supplementary Credit) e faatupe ai le tele o galuega tau auala ma ala laupapa I le talafatai o Apia, e tapena ai mo Taaloga o le Pasefika I Saute, aemaise le tatou nofo sauni ai mo faalavelave faale-natura e ono tutupu mai.
Mo isi atinae tau auala I nuu tua, e $1.5million Tala ua faatatauina mo le faia o le ala laupapa I Salani ma le $2.3 miliona Tala mo le faamaeaina o le auala tele I Fagaloa.
5. Atinae o Tagata Tafafao Maimoa Mai Fafo
O le a faauaua pea ona ave le faamuamua i le vaega o tagata tafafao maimoa mai fafo e pei ona faailoa ai ile Faamatalaga o Vaaiga Taulai mo le Atinae o Samoa 2005-2007. E taua lenei vaega I le atinae o le tamaoaiga ona e le gata o le faatupulaia ai o tupe maua mai fafo, ae o le a faapea foi ona faaopopoina ai avanoa faigaluega I totonu o le atunuu, aemaise I nuu I tua.
E tusa ai ma le faataua e le Malo o le faalauiloaina o Samoa o se atunuu saogalemu mo tagata tafafao mai, ua tuuina ai I totonu o le tala o le tupe se vaega tupe e $3.7 miliona Tala mo le Pulega o Tagata Tafafao Maimoa Mai. O lea vaega tupe e aofia ai se vaega tupe e $200,000 mo le faalauiloaina o Samoa e le Pulega ma ana paaga. E iai le faamoemoe o le a galulue faatasi le Pulega ma le Pulega o Taaloga o le Pasefika I Saute e faalauiloa atu ai taaloga o le 2007, ina ia mautinoa e toatele ni turisi e malaga mai e matamata I taaloga I lea tausaga. E taua foi le maketiina o Samoa ina ia ausia se fuainumera maualuga o tagata tafafao maimoa mai e nonofo I faletalimalo I soo se taimi, ma ole a fesoasoani lea I le lagolagoina o lea vaega o le tamaoaiga. O se faaaliga a le Malo o Saina e faalauiloa Samoa o se atunuu e tafafao mai iai ona tagata-nuu, faatasi ai ma se polokalame tuufaatasi a le Pulega ma ana paaga e maketiina ai Samoa o le a mafai ai ona tatou maua lea faamanuiaga.
6. Atinae o Pisinisi
O lo’o ave pea foi le faamuamua a le Malo I le tapenaina o se siosiomaga talafeagai e saga unaia ai le atinae o pisinisi i lenei vaitau:
(i) E $150,000 le fesoasoani masani a le Malo mo le Ofisa Tutotonu mo le Atinaeina o Pisinisi Laiti (SBEC);
(ii) Ae $40,000 ua fuafua e faamatuu atu I isi faalapotopotoga tumaoti;
(iii) Ua faapea foi ona faaagaga le $15.0 miliona Tala e toe tuuina atu I le Faletupe o Atinae a Samoa, lea ua fuafua e faamaea le latou fale fou ia Fepuari 2007. O le a suia ai foi se vaaiga I le taulaga I Apia pe a maea lea galuega tele aemaise le faateleina ai o avanoa e lisiina atu I le au fai pisinisi. E maualuga le manatu o le a faatosina mai nisi faalapotopotoga mai fafo e faatuina ni a latou ofisa I totonu o lenei fale tele; ma
(iv) O lo’o fuafua foi e tali malo Samoa e ala atu I le Matagaluega o Pisinisi, Ala manuia ma Leipa I se fonotaga a le CODEX e faia mai I le masina o Oketopa 2006, ma e $76,000 se vaegatupe ua faatatauina mo lea faamoemoe.
7. Atinae o Taaloga
(i) Taaloga a le Pasefika I Saute 2007
E $37.5 miliona Tala le vaegatupe ua faatatauina mo le Pulega o loo nafa ma le tapenaga o le Taaloga o le Pasefika I Saute 2007 aua le faamaeaina o malae ma fale taalo mo taaloga faataitai ia Tesema 2006, faalauiloaina o taaloga faapea le atinaeina o le au taalo a Samoa.
O le fausiaina o nei fale taalo tetele ia ausia tulaga faava-o malo, o le a mafai ai e Samoa ona talimalo I soo se taaloga i le Pasefika ma le Oceania. O loo aofia ai foi ma le faatupeina o mea taalo manaomia mo taaloga e faia I Faleata ma toleniga a au taaalo aemaise ai le vaegatupe mo le faaleleia o Malifa lea o le a avea ma le isi nofoaga tumau mo au taaalo mai fafo, e lua ai ma le Iunivesite Aoao o Samoa.
(ii) Faaleleia o le Apia Paka
Ou te fiafia foi e faailoa atu le fesoasoani tele e tusa ma le $15.6 miliona Tala mai le Malo o Saina o lo’o faaleleia ai le Apia Paka aua le faatinoina o isi taaloga faapea ai ma sauniga faapitoa mo le tatalaina ma le tapunia aloaia o Taaloga o le Pasefika I Saute i le 2007. I le ma lea, e $2.1 miliona Tala le faatupeina o tagata poto faapitoa o le a aumaia mo le atinaeina o tagata taalo a Samoa mo ia Taaloga.
Ua faatatauina foi e le Malo se vaegatupe e $0.9 miliona Tala aua le galuega faatino a le Komiti Faafoe a le Paka. E aofia I lea vaegatupe le $0.6 miliona Tala mo le faatauina mai o mea taalo manaomia mo taaloga afeleti (athletics), tenisi, netipolo, basketball ma lakapi mo Taaloga o le Pasefika I Saute 2007.
Mo le atinae o taaloga I nuu tua, ua faaagaga se vaegatupe e $0.1 miliona Tala mo le fausiaina o malae taalo ma le isi $0.1 miliona Tala mo le faatinoina o le Samoa Games lea e faia I tausaga uma e atinae ai a tatou tagata taaalo. Ua faatatauina foi le $0.2 miliona Tala e tufatufa atu e fesoasoani I le faatupeina o au taaalo sii atu I faagatama I atunuu mamao ae faapea foi mo asosi o taaloga o loo faia a latou faagatama I Samoa nei.
E talitonu lo tatou Malo ole tele o vaegatupe ua faaaluina I taaloga e taua tele, aemaise mo le atinaeina o tupulaga talavou mo faaga-tama I fafo e maua avanoa ai mo le faaleleia o tatou tamaoaiga, ae avea foi ma saofaga ile atinae ole tatou atunuu.
8. Saogalemu o le Atunuu
Talu ai le taua o le avea o Samoa o se atunuu saogalemu i le taumafaiga mo atinae o tagata tafafao maimoa mai fafo ma le faatosinaina mai o tagata faipisinisi, ua siitia maualuga ai le Tala o le Tupe a le Matagaluega o Leoleo ma Falepuipui aua le faatinoina lelei o a latou tiute autu o le tausia o le filemu, taofia o solitulafono aemaise lava mai aafiaga o fualaau faasaina ma faiga fouvale mai fafo, ma le puipuia o soifua ma meatotino.
(i) O le a fausia se Ofisa Tutotonu fou mo le Matagaluega o Leoleo ma Falepuipui I lea tausaga faaletupe I lalo o le fesoasoani faapaaga a le Malo a Ausetalia ma Niu Sila I se aofaiga e $11.2 miliona Tala, lea e aofia ai ma le faaleleia o auaunaga faa-leoleo e pei ona faagasolo nei. O lenei atinae o le a unaia ai foi le galulue o alii ma tamaitai leoleo I le tau foia o solitulafono ona ua faaleleia le siosiomaga faigaluega.
(ii) I lea itu, ua faaagaga le $0.16 miliona Tala mo taavale fou e 6 a le Matagaluega aua le faaleleia o le auaunaga mo le saogalemu lautele ma le puipuiga aemaise le tali vave atu I talosaga mo le fesoasoani.
(iii) E $1.16 miliona Tala se vaegatupe o le a faatuina ai le Ofisa o Tinei Mu, e ese mai le Matagaluega o Leoleo ma Falepuipui, pe a pasia le Tulafono e le Palemene. O lenei tuueseesega ua faia ina ia faaleleia atili ai lea foi auaunaga taua sa le iloga ona faataua I lalo o nisi o Matagaluega I tausaga ua mavae.
(iv) Ina ia faatinoina pea noatiaga a le Malo I Malo Aufaatasi, o lea ua faatatauina ai le $0.16miliona Tala mo le auina atu o vaega o leoleo e feasoasoani I le faato’a-filemuina o atunuu vevesi o le lalolagi.
9. Ofisa o le Fono Faitulafono
(i) Ina ia faamalosia le faagaioiga ma le pulega o Vaega Faaupufai I totonu o le atunuu aua le ausia o ni felafolafoaiga talafeagai ma aoga mo le atinae o Samoa I totonu o le Maota nei, ua siitia ai le vaegatupe mo Vaega Faaupufai I le $150,000. O lenei vaegatupe e faamoemoe e lagolagoina ai le galulue faatasi o vaega uma mo le lagolagoina o faiga faatemokarasi e pei on au iai nei le toatele o atunuu o le lalolagi.
(ii) E $1.1miliona Tala se vaegatupe ua faaagaga mo le faaleleia o le taualuga o le Maota Fono ma le $0.07miliona Tala mo le faaauauina mai o le apitagalu I tua atu o le Maota o Luafetasaga ma le Ofisa o le Fono. E faailoa atu foi ua faamaonia nei se fesoasoani mai le Malo o Saina mo le fausiaina o se fale tele e faia ai ofisa tumau o Faipule uma o le Maota.
Isi Fesoasoani mai Fafo
E fia faamauina foi lo tatou agaga faafetai I le Malo o Saina ona o le faamagaloga o aitalafau I lona aofaiga e 95 miliona tupe Saina po’o le $33.0 miliona Tala sa faatupeina ai nisi atinae. E fia faailoa atu foi ua faamaonia mai se isi fesoasoani a lea Malo i le fausiaina o le Fale mo le Ofisa o Faamasinoga I Mulinuu, ma e momoli atu ai le faafetai I le Malo o Saina faapea a tatou paaga uma o lo’o feasoasoani ma lagolago mai I le atinae o lo tatou atunuu.
Vaegatupe mo Galuega le Fuafuaina
E tusa ai ma le Vaega 29 o le Tulafono o le Pulega o Tupe a le Malo 2001, ua faaagaga ai se vaega tupe e $3.6 miliona Tala mo nisi o galuega faatino e ono tutupu faafuasei mai I totonu o le tausaga faaletupe.
VIII. TALA FAATATAU FAAOPOPO LONA LUA 2005/2006
Lau Afioga ile Fofoga Fetalai, ma le Mamalu o le Fono,
Ua tuuina atu faatasi ma lenei Tala Faatatau Autu o le Tupe 2006/07, le Tala Faatatau Faaopopo Lona Lua o le Tupe mo le tausaga faaletupe 2005/06. E $3.6 miliona Tala le aofai o tupe faaalu faaopopo o loo tuuina atu e faatupeina I fetuunaiga o tupe faasao mai polokalame ma vaegatupe a Matagaluega e $3.4 miliona Tala, ona tulai mai ai lea na o le $0.23 miliona Tala se vaegatupe faaopopo e manaonia lona faatupeina. Ona e leai ni tupe maua faaopopo o tuuina atu, o lea ua siitia ai le aotelega o tupe pa’ū ile $63.8 miliona Tala poo le tupe faasili e na ole $4,631. O lenei Tala Faaopopo Lona lua o le Tupe mo le 2005/06 ua faatupeina I fetuunaiga o vaegatupe mai tupe faasao ma o loo tuuina atu ai foi le auiliiliga o tupe sa faaaluina mai le paleni o Tupe Le Faatagaina e $0.52 miliona Tala.
IX. UPU FAAI’U
Lau Afioga I le Fofoga Fetalai ma Sui Mamalu o le Palemene,
E pei ona ou faailoa atu I le taimi ua sola, o le tala o le tupe ua faataatiaina I luma o le laulauafono a le Palemene sa fausiaina I luga ole faavae maumausali a le Malo ia faatautaia le tamaoaiga ole atunuu I luga o faiga faavae lelei ma le mautu tau tupe, e pei ona sau ai i tausaga ua tuanai. E ui I ni faigata ma toatugā I nisi o taimi, ae sa le álo le Malo mai le faaatinoina o ni faaiuga mausali e puipuia ai le saogalemu o le tamaoaiga. Ana le seanoa lea faavae, se manū e le mafai ona siitia le atinaeina o si o tatou atunuu ona o le tele o toatuga e lamatia ai mai faalavelave faafuasei ma aafiaga mai fafo, ma ole mea lea e tatau ona tatou nofo sauniuni ai I taimi uma e fetuunai faiga faavae tau tupe mai lea taimi I lea taimi.
Lau Afioga I le Fofoga Fetalai ma Sui Mamalu o le Palemene,
Le atunuu e, Samoa, ua faamalo taupati, faafetai le lagolago mai I fuafuaga a le tatou Malo mo le atinae ina o si o tatou atunuu. E matou te talitonu o le a tatou galulue faatasi I le faatupulaia o avanoa mo tagata uma e atinaeina ai o tatou lava tagata, ma faatupulaia ai pea le alualu I luma o si o tatou atunuu ma lona tamaoaiga.
E ia te au foi le ava ma le faaaloalo, e fai ai a’u ma sui o le Malo ma tagata-nuu uma o Samoa, e momoli atu ai le agaga faafetai I a tatou paaga uma ua fesoasoani ma lagolago mai I le atinae o le tatou tamaoaiga, faatasi ai ma sa’u faafetai faapitoa I galuega faatino o loo faagasolo nei ma a tatou paaga I le faatulagaina o fesoasoani e maua mai, ina ia mafai ona vave tali mai ai i o tatou atinae fuafua. O fesoasoani mai a tatou paaga I nei tausaga e tele e aofia ai galuega tetele, fesoasoani faa-faufautua ma le aoaoina o tatou tagata. O le faatinoga foi o ni suiga o faiga faavae mo le faaleleia o le auaunaga a le Malo I le 10 tausaga talu ai sa lagolago malosi e a tatou paaga, ma e ao ai ona saga faafetaia lo latou fesoasoani ma le lagolago mai ia tatou atinae.
E le o se galuega faigofie le tatou galuega o faagasolo, aemaise ai ona o le laititi ma utiuti o punaoa a si o tatou atunuu e mafai ona tatou faalagolago iai. Ae peitai, a tatou toe manatu foi I le taunuuga maualuga ua iai le tatou folauga i lenei taimi, ona tatou faafetaia ai lea o le tatou galuega fau faatasi ma o tatou tagata-nuu, faapea ma a tatou paaga, aemaise ai le aapa mai o aao faaola ma le taitaiga lilo a lo tatou Matai Sili.
Lau Afioga I le Fofoga Fetalai,
Ma lou faaaloalo tele oute tuuina atu ai le Tala Faatatau o le Tupe mo le tausaga faale-tupe 2006/2007 I luma o le laulauafono a le Palemene o Samoa mo lana iloiloga.
Ia faamanuia mai le Atua ia Samoa ma ona tagata.
Soifua.
